கேரள மாநிலம் வயநாடு மாவட்டத்தின் மேப்பாடி அருகே கல்லாடி–மீனாட்சி பாலம் பகுதியில் இன்று (ஜூலை 7) நிலச்சரிவு ஏற்பட்டது. தொடர்ந்து பெய்து வரும் கனமழை காரணமாக இந்த நிலச்சரிவு ஏற்பட்டதாக முதல்கட்ட தகவல்கள் தெரிவிக்கின்றன.
அதிகாரிகள் தெரிவித்த தகவலின்படி, அணக்கம்பொயில்–கல்லாடி–மேப்பாடி சுரங்கப்பாதை திட்டப் பணிகள் நடைபெற்று வந்த இடத்திலேயே நிலச்சரிவு ஏற்பட்டுள்ளது. சம்பவம் நிகழ்ந்தபோது அங்கு பணியாற்றி வந்த தொழிலாளர்கள் மற்றும் அருகில் இருந்த சிலர் மண்ணுக்குள் சிக்கியிருக்கலாம் என்ற அச்சம் நிலவுகிறது.
சம்பவம் குறித்து தகவல் கிடைத்ததும் தீயணைப்புத் துறை, காவல்துறை மற்றும் தேசிய பேரிடர் மீட்புப் படை (NDRF) வீரர்கள் சம்பவ இடத்துக்கு விரைந்து சென்று மீட்புப் பணிகளைத் தொடங்கினர். உள்ளூர் மக்களும் மீட்புப் பணியில் இணைந்து உதவி செய்து வருகின்றனர்.
ஆரம்பகட்ட மீட்புப் பணியில் மூவர் உயிருடன் மீட்கப்பட்டதாக தகவல்கள் வெளியாகியுள்ளன. எனினும், இடிபாடுகளுக்குள் மேலும் யாரேனும் சிக்கியுள்ளனரா என்பதை உறுதிப்படுத்தும் வகையில் தேடுதல் மற்றும் மீட்புப் பணிகள் தொடர்ந்து நடைபெற்று வருகின்றன.
கேரள மாநில அமைச்சர் டி. சித்திக் மற்றும் வயநாடு மாவட்ட நிர்வாக அதிகாரிகள் சம்பவ இடத்தில் மீட்புப் பணிகளை நேரடியாகக் கண்காணித்து வருகின்றனர். இச்சம்பவத்தில் ஒருவர் உயிரிழந்ததாகவும், 7 பேரைக் காணவில்லை என்றும் முதல்கட்ட தகவல்கள் வெளியாகியுள்ளன.
வயநாடு மாவட்டம் கடந்த ஆண்டு மிகப்பெரிய இயற்கைப் பேரிடரை எதிர்கொண்ட பகுதிகளில் ஒன்றாகும். 2024 ஜூலை மாதம் மேப்பாடி ஊராட்சிக்குட்பட்ட முண்டக்கை மற்றும் சூரல்மலை பகுதிகளில் ஏற்பட்ட பேரழிவு நிலச்சரிவில் நூற்றுக்கணக்கானோர் உயிரிழந்ததுடன், பலர் வீடுகளையும் வாழ்வாதாரங்களையும் இழந்தனர். அந்தச் சம்பவத்தின் தாக்கத்தில் இருந்து அப்பகுதி முழுமையாக மீளாத நிலையில், தற்போது மீண்டும் ஏற்பட்டுள்ள இந்த நிலச்சரிவு அங்குள்ள மக்களிடையே அச்சத்தையும் கவலையையும் அதிகரித்துள்ளது.
